「世界新七大自然奇跡」入圍名單，香港嘅望夫石榜上有名，同美國嘅大峽谷、珠峰、大堡礁等等，爭入最後嘅七強。嘩，呢個咁意外嘅結果，直頭好似電視台嘅音樂頒獎禮咁，最受歡迎都可以係爆冷。

香港嘅望夫石可以同大峽谷齊名，咪《囍帖街》同《Phantom of the Opera》齊齊上台攞獎？香港嘅望夫石入圍大自然奇跡，一定會令到佢班Fans，即係嗰啲日日係屋企等老公係大陸返嚟嘅太太們高興。

不過查實香港除咗望夫石之外，仲有好多好出名嘅石，應該有資格入選大自然奇跡，譬如「碳石」。「碳石」乃係一舊石上面，有好多燒過嘅碳嘅行跡，通常都係有人去燒烤場搵唔到位之後，就霸王硬上弓，搵隔離嗰舊石，就係上面燒佢醃咗嘅雞翼、嗰件豬扒、成條大香腸就咁B佢嗰BQ，之後就非常無手尾留低嗰啲碳灰殘餘物，久而久之，舊石就會變成「碳石」。「碳石」絕對係香港嘅一個奇跡。

除咗「碳石」之外，係香港各大郊外時常會出現嘅大自然奇跡就係「爆石」。「爆石」顧名思義就係有郊遊嘅人士因為人有三「屎」急，搵唔到洗手間，就用幾舊石仔，自製咗一個類似圍牆嘅小擺設，然後褲頭一鬆，雙腳一蹲，Pengpong一聲，就係嗰個自製天然流動廁所上面爆咗舊石，就係為之「爆石」。通常爆出嚟嗰舊石上面都會有啲tantle, tanmo或者tanple之類嘅Tissue遮住咗佢，跟住佢就會抽褲起身拍拍屁股走人。「爆石」都乃係香港特有嘅大自然奇跡。

除此之外，仲有商場好多舖頭買嗰啲咩鬼嘢水晶石、瑪瑙石，又話可以改運、改風水、改運程、改名、改姓、改地球，嗰啲咁樣，呢啲石奇在係有人賣、有人買、有人擺、有人戴，嗰吓奇。

查實小弟屋企樓下都有一啲石，絕對可以入呢一個大自然嘅奇跡，就係大堂最近換嗰啲雲石。呢一個係香港特有奇景，辛勞半生，畀首期，每月供大半嘅人工或者以上，有好多都係去咗呢一啲每日踩出踩入，又濁又玉嘅雲石。呢一啲雲石唔入新七大奇景，砌低嗰啲最靚嘅大峽谷、大堡礁，真係乜都得喇。

再數，仲有另外一種石都應該要入圍，就係我哋由細睇到大，係呢一個歡樂滿東華、台慶、星光熠熠賀新春裏面，嗰啲叫「心口碎大石」。呢一舊「心口碎大石」，犀利在從來都無碎到嗰心口，淨係碎到舊石，查實觀眾睇到幾無癮。

各位觀眾，「心口碎大石」可能比較普通，雕蟲小技。以下呢舊石肯定比望夫石多人鍾意，無理由唔可以成為世界大自然奇跡，就係香港人好鍾意嘅「落井下石」，唔係世界之最咩？掟石喇！

Source: 林海峰-維園阿伯 2009/01/09