「條條fing」發信抗議部分議員，不斷以粗暴嘅行動同埋語言，衝擊議事規則，嚴重背離議事規則互相尊重嘅精神，對此深切遺憾。又係深切遺憾嘅？掟蕉又係深切遺憾、掃台又係深切遺憾、用粗言衝擊又係深切遺憾，直頭要成立一個深切治療部，去應付咁多深切遺憾。

查實又有無人會去信抗議司長、官員濫用深切遺憾呢？係又深切、唔係又深切，搞到原本好有「力水」嘅，因為聽得太多嘅關係，而變成減低咗藥力。除咗深切遺憾之外，佢哋常常掛喺嘴邊嘅就有呢一個「呢個係個別嘅事件，我哋係唔會評論嘅。」將大件事撥入個別事件嘅file裏面，然之後索性冚埋，又會唔會都一樣係背棄咗啲規則咁樣呢？明明要處理又唔去處理，直頭係揸住手提扮話收得唔清、聽唔到、水底聲，跟住索性cut線。一出到個別事件咯喎，「砰」門就話知都係破壞咗互相尊重嘅精神，咁又值唔值得表示深切遺憾呢？

市井嘅口頭禪係粗口、俗語，西裝筆挺、有司機開門、自有另外一套嘅語言，譬如事後補飛，時常都用到「我哋係會嚴肅處理嘅。」呢一類霎耳聽落OK，聽落其實係廢話嘅四隻大字，以後會嚴肅處理，咁莫非之前係求其懶理？如果係嘅話，咁點解唔肯倒扣人工？正所謂回水喇唔該，唔好講咁多，但係偏偏廢話就越聽越多，甚麼一定會公開、公平、公正、一定吖、即刻吖，淨係「積極務實」呢四個大字，喺呢幾年都聽唔少喇。佢哋嘅積極務實差唔多係等於你去幫襯嗰間餐廳，嗰個妹妹仔出嚟同你講歡迎光臨（いらしゃいませ）嗰啲咁樣一樣，即係話係又嗡，唔係又嗡，死背。

問題係喺議事堂裏面講粗口、俗語，就被司長去信批評，但喺生活上面，除咗粗口、俗語之外，都仲有另外一種就叫做廢話嘅語言，係一樣可以教壞細路，何解有人批評粗口語言，但係無人走出嚟嘈下嗰啲廢話高官嘅呢？對於呢件個別事件，我係表示深切遺憾。

Source: 維園阿伯 - 林海峰
http://www.881903.com/page/zh-tw/audiocolumndetail.aspx?ItemId=107556