有錢使仲煩

冇錢使，煩；有得使，仲煩。家陣間間舖頭做特價，未幫襯先眼瞓。眼瞓係因為要聽售貨員解釋，點樣依家買兩件80蚊，加多一件平10蚊；如果50蚊買四件，又可以送多一件；咁一次過買四對就一千蚊；若果八對就回番一百蚊；一百蚊買五件送一蚊；一蚊一碟，食到十碟免費送多一碟；呢一碟原本八蚊，依家特價做梗四蚊，但要食番三碟，咁就買番一件，再補多八蚊，就現金回贈60蚊；特價到聖誕，星期六日仲有兩折，星期一至五就冇，但係平時買滿一千蚊就可以有24 小時免費泊車；若果泊四架車可以有八五折。嘩，你話係咪有得使，仲煩呢？

減價招數之多，有如海嘯個勢咁，湧埋嚟啲消費者度。以往係消費者入去講價，家陣調轉，推銷員同你講價，因為唔講唔明啊嘛，但一講就唔停。老老實實喇，間間都話平俾我，不如直接啲俾啲Cash我好唔好？

雷曼海嘯價唔凈止講梗樓盤，百貨公司都配合時勢，推出海嘯大特價，消費者得到「平」嘅同時，得到埋一堆「煩」啊。得不償失，所以呢一個世界真係No free lunch。使錢以為可以送走煩惱壞心情，點知剛剛相反，俾錢嘅時候又要睇下邊張卡有折，邊張卡無折咁樣，鬼咁煩。可唔可以簡簡單單一條龍啊？一張碌鬼曬咪算囉，家陣搞到成個銀包都係卡，臃臃腫腫但現金欠奉，直頭好似脂肪咁：「大嚿無用」。

全線大減價，減價優惠又煩又多，搞到有得使都仲煩。不過，大家嗰啲算得係乜嘢，俾著你係台灣第一家庭，有咁多錢使，你唔煩咩？老老實實，呢一家人要咁多錢嚟做咩呢？究竟佢哋想買乜呢？頂多咪Sogo禮券，跟住個仔搭下飛機唔讀書慳番學費，阿扁最多揾下啲錢買下頭蠟嚟蠟下頭，要咁多錢嚟做咩嘢呢？佢哋啲錢多到可以喺月球起個地球，或者喺個地球起番個月球咁滯。諗下諗下，佢哋都幾煩，煩在有太多錢，唔知點使；煩在太太又好煩，個仔、新抱又好煩，個女仲煩，又大聲又嘈。大把錢，但家嘈屋閉，呢啲就「窄使」啦，唔怪得《家好月圓》咁好睇。

Source: 林海峰-維園阿伯 2008/11/14